العلم نورن

مساءكم لذيذ
الله الغني عن هذا التعليم الفاشل واللي هوا مش فاشل عشان الطلاب مش بيحبوه ابدا والله اغلبيه طلاب العالم ما بيحبوش المدرسه او الكليه اللي هي وسيله التعليم لان العادي ان ربنا خلق الانسان بيحب مجال واحد وعنده استعداد قوي انه يشتغله ويبحبه ويجدده عشان كدا المفروض انه يبقي متفوق ف ماده ويبقي تفكيره فيها بنفس مستوي المدرس بتاعه وما يبقاش غبي او بليد لمجرد انه متوسط ف باقي المواد لانه ببساطه جدا مش حايشتغل مهندس ودكتور بس عشان التعليم بتاعنا متميز عن غيره فهو متوقع ان الطفل المصري هو اذكي اطفال العالم وعنده قدرات خارقه بحيث انه " يفهم " كل المواد وف الاخر يكمل ف شغل بيختص بماده واحده بس

نظام عبقري يسمي بالتنسيق والمجموع دا ف رايي المتواضع سبب ان الكام جيل اللي فاتو مش عارفين هما موهبين ف ايه؟؟ او عاوز يدخل كليه ايه ؟ لان للتوضيح انت لما يبقي مطلوب منك تجيب الدرجه اللهم احفظنا الدرجه النهائيه ف كل المواد انت مش عارف انت بتحب ايه

لما المدرسه بتاعتك تعمل مسابقات اوائل طلبه ف كل المواد حاتعرف منين انهي مجال انت بتحبه ويا سلام بقي لو انت مش من اوائل الطلبه المصيبه انه المدرسين يحاولو يستفزوك عشان انت اقلل منهم
يافرحه مدرستكم بيكم والله
التفوق الحقيقي ف وجهه نظري الغير متناهيه من الخطا انك تحب ماده تحبها جدا تتعامل معاها بإختلاف عن باقي المواد تعملها ابحاث تقرا عنها كتير واياك تتعب دماغك او حتي تفكر ف المواد التانيه دي خالص
تذاكرها اه بس تحافظ ع مكانه الماده اللي انت بتحبها لان دي اللي حاتتخصص فيها ف كليه ايا كانت مجموعها عالي او واطي انسي نظره الناس الغبيه اللي تحدد ذكائك من مجموعك واشتغل ابدع ابتكر
اوعي تكون درجه نهائيه ف كل المواد وتطلع كليه طب تعيش وتموت ويبقي كل اللي عملته ف 50 او 60 سنه ان في ناس حبتك واتأثرت لما سيادتك رحلت
الحياه اكبر من الهدف الضئيل المتعفن دا بكتير جدن ما تستبعدش تكون انت ستيف جوبز او احسن ليه ما تكونش انت اول واحد يخترع عربيه بتطير او انك تكون حاكم لبلد شعبها منساش كنت قد ايه ديموقراطي او كويس وتدرس ف كتب التاريخ ليه ليه ليه


الخلاصه المتخلصه
الوسيله انك تعمل فرق ف الدنيا دي قبل ما تموت والناس تفتكر سيادتك انك تبتكر والوسيله اللي تساعدك انك تبتكر ان يكون عندك ابداع والوسيله اللي تساعدك عشان يكون عندك ابداع انك تتفوق ف المجال اللي ربنا خلقك بتحبه وتنسي شئ اسمه حفظ وتنسي نظره الناس لان بكل بساطه لو نحجت مش هما اللي اللي حايتحط اسمهم ولا برضه فشلت مش هم اللي حايموتو والناس تنساهم



يجي لي واحد ويقولي طب لو الكلام ده بعد الشر صح وانا ربنا عاطي لي موهبه وعملت بالكلام اللي فوق دا وطورتها وابتكرت فيها
بس لان ربنا مش عاطيني موهبه ف باقي المواد ما اتفوقتش فيها وبالتالي ما جبتش مجموع عالي وما دخلتش كليه ادرس فيها المجال اللي بحبه يأما اقعد ف البيت واقشر رمان يأما ادخل معهد او كليه اقلل ( مع كامل الاسف لذكر المعهد لانه مش حاجه وحشه لا سمح الله )

ف الحاله دي اسيب لكم الاجابه لان انا نفسي مش عارفها للاسف

 محمد ادم

العلم نورن