من مكارم الأخلاق الصدق والأمانة والحلم والأناة والشجاعة والمروءة والمودة والصبر والإحسان والتروي والاعتدال والكرم والإيثار والرفق والعدل والحياءوالشكر وحفظ اللسان والعفة والوفاء والشورى والتواضع والعزة والستر والعفو والتعاون والرحمة والبر والقناعة والرضى.
كان فيه كتاب كدا بناخده لحد رابعه ابتدائي كان عن الاخلاق علي ما افتكر اينعم مكنش لازم نقراه اصلا بس كان موجود .
تكبر حبتين كدا وتوصل للاعدادي مرحله " تكون او لا تكون " ونصايح الناس اللي يقولك " من اول يوم لااااازم تثبت نفسك انت يأما راكب او مركوب " وتبدي مرحله لطيفه توصل فيها انك تخاف تتعامل بأخلاق عشان يأما حايتقلس عليك او تضرب او يبقي ملكش صحاب ... ودا واقع مش راي للاسف .
الواقع برضو ان مش كل اللي ف اعدادي وحشين بس يتهيالي الاسطوره بتقول ان فيه واحد هو اللي كان وحش وضحك ع اللي بيتعامل بأخلاق او ضربه ومن هنا كله بقي زيه خوفا من الضرب او التأليس وانتشرت الحكايه واتطورت وبقت مش مجرد واحد بيخاف يتعامل بأخلاق وبس لا دا بقي العكس تماما لانه عاوز يكون برنس الشله ومتفوق عليها
للاسف دي ثقافه جيل بحاله لما يكون بيهزر مع صاحبه بيشتمه بأهله نفر نفر ويروح ع الحمامات يشرب سجاير واول ما يشوف اي بنت لازم يعلق عليها وعلي لبسها وعادي ف الشارع قدام الناس .. جيل اهم حاجه عند اهله درجه الامتحان اللي بيها حايطلع دكتور او باشمهندس زي ابن خالته
جيل فسحته انه يتمشي ف الشوارع يغلس ع " السيس " ف نظرهم ويعاكس ف البنات ويقولو ماهما اللي لابسين وهما اللي نازلين وهما اللي بنات اصلا ودي تعتبر غلطتهم ويروح حاجز تذكره لفيلم السبكي
الثقافه دي بتبدأ بالظبط من 4 او 5 ابتدائي ... عارف انها صعبه وانهم لسه عيال بس دا للاسف برضو واقع
نجيب محفوظ قال زمان اول ما ظهرت مطالب تطبيق الشريعه ان تطبيقها الفعلي مش ف القوانين والمنع انما ف التربيه الدينيه والاخلاقيه الصح للشباب عشان متبقاش حاجه منعاهم من الغلط غير نفسهم لانك لو فاكر انك تقدر تفرض الاخلاق علي حد بدون اقناعه تبقي بتضحك علي نفسك
ليه متبديش بنفسك بعيد عن صحابك كدا ف الخفاء وجرب صفه من الاخلاق عادي يعني
غير الواقع
بس كدا !
انا عندي اقتراح فوق عند مكارم الاخلاق حتلاقي كل صفه باللينك بتاعها اتفق مع نفسك كدا كل يوم تقرا واحده وتطبق عليها :)
