صحفي ايطالي جمع اولاد وعرفهم علي بنت وطلب من كل ولد فيهم يضرب البنت دي بالقلم .. كلهم رفضوا ومبررهم كان ياما عشان انا ضد العنف او علشان هي جميلة او علشان انا راجل .
اما بقي فيه مصر المعروفة بأم الدنيا او " الاحسن من سوريا والعراق" سألت صحفية مجموعه اولاد تقريبا من سن الولاد الايطاليين هما ليه بيضايقوا البنات في الشارع فكان ردهم انها لو لابسة مش محترم يبقي تستاهل اللي يجرالها وان هي اكيد اكيد نازلة من بيتها عشان يحصلها كدا . واللي حس ان الكلام دا شوية غلط قام قالها الصراحة احنا غلطانين بس وهما كمان .
وفي الفيديو التاني اطفال برضك من مصر واحد بيقول انه بيكمل نص دينه والتاني بيقول أعاكث . وتعليق علي الفيديو من شخص عربي بيقول الحمدلله اني مش مصري وبيضحك .
وبنت سعودية بتقول للبنات المصرية ربنا يكون في عونكم .
الفجوة خلاص بقت كبيرة اوي ولازم نحس بيها .. مثلا نبطل ننشر فيديو لمصطفي محمود بيقول ان الجهل حيخلينا زي القرود والعالم المتطور يتفرج علينا ويدرسنا .. انسي كلمة " حيخلينا " خلاص احنا وصلنا للمرحلة دي وبقينا محل سخرية العالم اللي بيشوفنا من خلال جهاز الكفتة ولا عفاريت ريهام سعيد .. كفاية بقي الوهم ان احنا احسن من سوريا والعراق .. مش بتحس ببؤس كدا لما تقارن مصر ببلاد محتلة عشان تحس بالرضا ؟
وبالمرة بقي نبطل نقول تحمرش ونألس علي الحقوقيين في مجال حقوق المرأه .. سخافتك دي اللي خلت العيال دي تبقي كدا . ولو لسة شايف الموضوع تافه ويستحق التسخيف عليه اعرف ان فيه بنت غرقت في النيل وهي بتحاول تهرب من متحرش .. ماتت.
ومترميش بقي أقصي اليمين وتقول دا شعب متخلف ومكتوب عليه التخلف ومش حيتغير ابدا .بطل انت بس سلبية وافتكر انك محسوب علي الشعب دا فيأما انت العبقري اللي فينا ياما انت من ضمن المتخلفين دول ومتنساش ان كل المصريين بيقولوا علي المصريين شعب متخلف .
